DILI, 11 jullu 2024 (TATOLI) – Esforsu ida. Rezultadu ida. Entre sorte no kompromísiu ba gaña vitória, lori ekipa kapitál Dili – São José FC, ‘ukun’ Relay Laleia FC liuhusi fura guarda-rede ho golu; 2-0, iha jornada kuartu finál.
Ho rezultadu ne’e, Ekipa São José FC avansa ona ba finál kopa Federasaun Futeból Timor-Leste (FFTL) hodi hein ekipa rua ne’ebé sei kontra malu iha kinta 11/07 entre B2B ho DIT FC.
Iha kuarta lorokraik ho euforia adeptu sira, tuir oráriu jogu, apitu dahuluk lian husi Árbitru Bernardino Mascarinhas husi Viqueque Timor-Leste, Estádiu Munisipál Dili ekipa adversária rua lansa kedan kontra no atake ba malu tuir tékniku no abilidade ekipa idaidak nian, tuir orientasaun treinadór idaidak, oinsá atu prodús golu.
Iha kompetisaun ne’e, ekipa São José ho serbisu ekipa ne’ebé di’ak tuir kompeténsia – koñesimentu no kapasidade: tékniku, tátika no estratéjia, halo Relay Laleia FC tenke halo esforsu maka’as. Maske nune’e, São José konsege hatudu jogu bonito halo Relay susar atu kombate iha batalla durante jogu la’o iha minutu primeira parte.
Iha kampu kuadradu Estádiu Munisípiu Dili, São José domina bola hodi halo presaun maka’as iha minutu ba minutu; sutu barak mak avansadu São José ezekuta maibé sutu hirak ne’e seidauk kona iha alvu.
Ekipa Dili ne’e nafatin halo presaun ba Relay Laleia FC. Pasa bola iha kampu laran – corner kick, passing (pasa), clearing, etc, ekipa São José halo Relay dada iis la di’ak. Nune’e, hanesan proverbiu dehan “Rezultadu la nega prosesu”, ho esforsu ekipa nian, São José liuhusi nia jogadór Aldo Amaral (21) iha minutu 43 konsege muda rezultadu; 1-0. Golu ne’e hanesan golu ikus iha minutu primeira parte nian.
Iha 45 daruak, ekipa rua nafatin hatudu jogu ne’ebé kualidade, Relay tenta hadi’a nia performe husi lina ba lina, maibé la konsege kombate atake ne’ebé São José halo.
Nune’e São José nafatin ‘ukun’ bola hodi hamate tutuir jogu ne’ebé Relay halo. Nune’e iha minutu 48 husi minutu 90 tuir padraun jogu, Jogadór Expedito Conceição lansa tan golu segundu hodi hametin rezultadu ba 2-0 to’o apitu finál husi Árbitru Bernardino Mascarinhas – Árbitru ne’ebé lidera jogu entre ekipa adversáriu rua iha lorokraik ne’e.
Ikusmai, vitória pertense ba São José. Enkuantu, Relay Laleia FC, husi munisípiu Manatuto, obrigadu hein buka fali terseiru lugar, liuhusi sei kontra entre ekipa rua ida B2B no DIT.
Jornalista: Hortencio Sanchez
Editór: Rafael Ximenes de A. Belo