DILI, 14 jullu 2024 (TATOLI) – Ekipa husi Dili, São José FC sai kampeaun ba kopa Federasaun Futeból Timor-Leste (FFTL) hafoin halakon nia adversáriu B2B FC ho rezultadu mihis 1-0.
Iha domingu lorokraik ne’e, ekipa São José FC husi Dili no B2B FC kompete hodi buka hadau malu sé loos mak atu hetan primeiru lugar iha kopa FFTL iha jogu ne’ebé realiza iha estádiu munisipál Dili.
Iha kompetisaun ne’e, ekipa rua halo esforsu másimu hodi lori vitória ba idaidak nia ekipa ho fair play.
Ho euforia husi adeptu sira, tuir oráriu jogu, árbitu dahuluk lian husi árbitru Francisco Pereira iha estádiu Dili, ekipa adversária rua lansa kedan kontra-atake ba malu tuir tékniku no abilidade ekipa idaidak nian, tuir orientasaun husi kada treinadór oinsá atu prodús golu.
Iha kompetisaun ne’e, São José ho serbisu ekipa ne’ebé di’ak no iha abilidade téknika, tátika no estratéjia, halo B2B tenke halo esforsu maka’as.
Maske nune’e, São José konsege hatudu jogu bonitu halo B2B susar atu kombate iha batalla durante jogu la’o iha primeira parte.
Iha kampu kuadradu estádiu munisipiu Dili, B2B mós domina bola hodi halo presaun maka’as husi minutu ba minutu, sutu barak mak avansadu B2B ezekuta, maibé sutu hirak ne’e seidauk kona iha alvu.
Ho nune’e, iha primeira parte iha minutu 45 laiha ekipa ida mak prodús golu nune’e rezultadu tenke termina ho score 0-0.
Hakat ba segunda parte ekipa rua nafatin lansa kontra-atake ba malu ho velosidade maka’as no ho ambisaun atu hatama lalais golu, nune’e bele manán iha jogu ne’e.
B2B halo esforsu oioin oinsá hamate São José nia jogu, maibé esforsu hirak ne’e hela de’it hanesan esforsu tanba nunka halo golu.
São José hala’o jogu ho estratejia ne’ebé bonitu. Konsege domina bola, nune’e iha minutu 70 jogadór Rufino Walter Gama (7) konsege les rede B2B no muda kedan rezultadu ba 1-0. Golu ne’e halo B2B dada iis naruk no susar atu reziste.
Esforsu hotu B2B halo maibé difísil atu kombate. São José joga ho kalma hodi hein minutu normál husi minutu 45 segunda parte nian termina hodi bele manán jogu ne’e.
Iha rezultadu ikus, vitória pertense ba São José tanba manán nia adversáriu B2B ho rezultadu 1-0. Husi score ne’e hatudu momós katak São José mak sai nu’udar ekipa forte iha kopa FFTL 2024 hodi manán tasa no prémiu monetáriu hamutuk $15.000. B2B ne’ebé hela ho segundu lugar hetan osan $10.000.
Jornalista: Hortencio Sanchez
Editora: Maria Auxiliadora