BOBONARO, 29 jullu 2024 (TATOLI)-Merkadu Soso ne’ebé lokaliza iha Suku Holsa, postu administrativu Maliana, munisípiu Bobonaro to’o agora sei kontinua abandona no du’ut mak nakonu tanba laiha kontrolu husi Governu dezde finaliza konstrusaun fíziku iha tinan 2019.
Xefe suku Holsa, António Santa Cruz, prekupa tanba merkadu ne’e konstrui ho orsamentu estadu ne’ebé bo’ot, maibé to’o agora negosiante sira la utiliza ba halo atividade negósiu.
Notísia relevante: Negosiante Maliana husu tetu didi’ak bazár movel iha merkadu Mau-Mali no Soso
“Ami sente triste tanba Governu konstrui ho orsamentu ne’ebé boot, maibé konstrusaun ne’e hotu tiha, ita seidauk bele utiliza ho di’ak, planu governu munisipál halo konstrusaun ba merkadu ne’e, husu atu muda vendedór sira iha Maliana ne’e ba iha fatin sira hanesan Mau-Mali no mós Sidi, maibé até agora Mau-Mali uza ona, maske la másimu, maibé Soso ne’e até agora fatin ne’ebá ne’e sei mamuk, du’ut mak nakonu,” nia informa ba jornalista Tatoli iha Maliana.
Prezidente Autoridade Munisípiu Bobonaro, Alexandrino Pires, rekoñese merkadu ne’e abandonadu tanba laiha orsamentu no daudaun autoridade munisipiu sei foka ba re-konstrusaun merkadu Mau-Mali, maibé planeia iha tinan 2025 sei tau orsamentu atu halo manutensaun, kompleta fasilidade no konstrui moru protesaun.
“Ita koloka inan-aman sira, loke espasu ba sira, atu nune’e merkadu labele mai de’it iha kapitál, merkadu ne’e ita dudu ba fatin ne’ebé Governu anteriór halo ne’e, ita reativa, kontrola no halo jestaun,” nia katak.
Líder másimu Bobonaro ne’e esklarese bainhira merkadu ne’e funsiona sei muda negosiante balu husi merkadu Maliana, tanba merkadu atuál ladún organizadu ho di’ak.
“Ha’u la hanoin aat ba imi, dehan atu sobu imi, duni imi, maibé ita muda hanesan atu lori hatuur ona ita-nia kapitál munisípiu Bobonaro ho organizadu,” nia hateten.
Autoridade Munisípiu Bobonaro planeia muda negosiante sira tanba merkadu sentrál Maliana atu fó ba investidór sira halo investimentu hodi loke sentru komérsiu munisípiu.
Enkuantu kapitál Maliana daudaun iha merkadu tolu hanesan merkadu sentrál Maliana, Mau-Mali no merkadu Soso.
Notísia relevante: Vise PPN preokupa merkadu rua iha Maliana abandona
Jornalista: Sérgio da Cruz
Editór: Evaristo Soares Martins