DILI, STLNEWS.co – Desizaun Ministra Saude (MS), Elia dos Reis Amaral neebe halo ajudikasaun direta ba kompanhia neebe laiha esperiénsia sosa aimoruk, bele rezolve stok out aimoruk ka lae.
Prezidente Komisaun F, Deputada Maria Barreto Gorimali hatete, husi komisaun F seidauk asesu ba informasaun relasiona ho Ministra Saude halo ajudikasaun direta ho kompanhia balun atu sosa aimoruk.
“Maibe ami akompanha notisia katak, MS halo ona ajudikasaun direta ba kompanhia ida, agora dehan kompanhia nee seidauk iha esperiénsia. Ida nee ba ami mos sai duvidas oituan, tanba bazeia ba esperiénsia durante nee hau iha komisaun F husi V Lejislatura too VI Lejislatura nafatin iha Komisaun F trata asutu Saude no Igualidade Jeneru, neebe hau akompanha diak loos ho prosesu sira nee, katak se kompanhia ida mak ladun iha esperiénsia ba iha prosesa aimoruk nian, depois mak ita akonpanha took iha futuru saida mak akontese, se rake bele hatan ba redusaun stok out aimoruk ou ita labele responde, mais mai ita hotu akonpanha,” hatete nia ba jornalista sira iha PN, Sesta (20/10/2023).
Nia afirma, mais ba ajudikasaun direta husi MS ba kompanhia ida nee mos preokupa oituan, tanba haree ba iha fiskalizasaun neebe Komisaun F halo iha SAMES no Diresaun Nasional Farmasia i Medikamentus, Laboratorium Nasional, HNGV, kuaze hotu-hotu ezije IX Governu liu husi MS atu halo alterasaun lalais ba iha dekretu lei numeriu 22/2022 11 de Maio, nee presiza altera lalais, tanba iha artigus balun neebe mak la fo dalan ba sira atu bele halo presesa lalais.
Nia tenik, nunee mos informasaun neebe hetan iha fiskalizasaun, Komisaun F mos haree direta dekretu lei neebe governu anterior fo sai katak, husu artigu 38 too artigu 42 nee, nia sita makaas liu konaba valores orsamentu neebe mak atu prosesa ka atu aprova ba iha importador ida presiza iha haree ba ninia montantes nomos presiza haree ba rekezitu neebe mak iha dekretu lei nee hatete.
Nia haktuir, ezemplu hanesan kuandu nia valores US$ 100 mil nia presiza partisipa iha konkursu nomos halo kotasaun nee tenki iha, se nia inferior husi US$ 100 mil mos nia rekezitu nafatin partisipa iha konkursu nomos kotasaun neebe mak iha, mais artigu ida iha 42 iha dekretu lei 22/2022 nian hatete katak, inferior husi US$ 100 mil entaun nia presiza bele halo kotasaun nomos ho konkursu, ou bele halo ajudikasaun direta kuandu situasaun nee emerjensia, nee tuir lei.
“Ita espera katak, dekretu lei ida nee iha ona alterasaun, se iha ona alterasaun laiha problema, mais ami seidauk asesu ba informasaun neebe mak klean altera ona ka seidauk, maibe husi Komisaun F nia fiskalizasaun, tanba nee desizaun neebe mak koletivu husi membrus Komisaun F neebe trata sauntu saude hotu-hotu rekomenda, antes atu halo prosesu ba iha kompras aimoruk presiza alterasaun uluk dekretu lei 22/2022 11 de Maio, tanba nia implikasaun nee boot, se la halo altersaun ita nafatin iha prosesu ida neebe mak lei, tanba lei la fo dalan, se iha ona altersaun buat hotu sei lao diak,” sublina nia.
(dom)