DILI, STLNEWS.co – Kontijente Timor Leste dezloka ona ba Xina hodi partisipa kompetisaun Asian Games ba dala 19, tanba nee sira husu ba povu Timor Leste atu suporta sira liu husi orasaun durante kompetisaun nia laran.
Lia hirak nee hatoo husi Prezidente Federasaun Boxe Amadora Timor Leste, Januario da Silva Brito ba STL bainhira dezloka ba Xina, iha Aeroportu Nicolao Lobato, Komoro, Dili Kinta (21/09/2023).
Nia dehan, modalidade boxing molok dezloka ba Xina antes nee halao preparasaun tempu badak nia laran, maibe tanba foin lalais nee sira foin fila husi Sea Games Kamboja, tanba nee mak kontinua prepara hodi ohin dezloka hikas ba Asian Games.
“Hanesan Prezidente Federasaun Boxing Timor Leste, hau husu apoiu masimu ba ita nia povu tomak atu suporta nafatin ita nia atleta sira liu husi orasaun,” tenik nia.
Nia dehan, ho preparasaun neebe mak naton, maibe sira sei buka oinsa para atu joga ho diak, maski nasaun 45 mak sei partisipa iha kompetisaun refere.
Iha fatin hanesan, Sekretariu Ezekutivu Konfederasaun Desportu Timor Leste, Antonio Carlos hatete, kontijente neebe mak dezloka uluk nee mai husi modalidade 5 Kompostu husi atleta hamutuk 16.
Modalidade sira nee mak hanesan Taekwondo, Boxing, Natasaun, Tiru nomos tênis kampu.
Enkuantu, modalidade sira neebe atu dezloka tuir tan mak iha 26 Setembru 2023 mak hanesan Karatedo, Atletizmu, Badminton no Halterofilismu.
(mar)