DILI, STLNEWS.co – Feto barak iha kapasidade no matenek hanesan mane, maibe sei menus kaer pasta iha governu.
Akademista Rofina Marques, tuir nia haree oras nee feto barak mak halao estudu iha universidade, no feto barak mos iha kapasidade, maibe realidade iha governu sei menus kompara ho mane.
“Ita haree iha Timor Leste feto barak iha potensial matenek, iha parte seluk ita bele dehan feto barak mak inklina aan iha governu mos iha, maibe menus tebes kompara ho mane sira. Ida nee tanba konfiansa husi Partidu Politiku, maibe hau fiar katak feto barak iha kapasidade bele kaer parta governasaun,” katak Rofina Marques ba STL iha Knaar fatin Kaikoli, Domingu (24/09/2023).
Nia hatete, iha Parlamentu Nasional atinji ona kouta, tanba nee husu feto sira presiza esforsu luta nafatin ba oin, maski ho bareira oin-oin.
Nunee mos eis Sekretariu Estadu Igualdade no Inkluzaun (SEII), Maria Fatima Coreia hatutan, feto menus dala ruma feto rasik mak seidauk buka atu bele bainhira nomeia, maibe dala ruma mos iha partidu politiku maioria ou domina husi mane.
“Ita haree iha IX Governu area estratejia sira la fo ba feto, no feto sempre asumi knaar mak iha area sosial deit hanesan saude, ministeriu solidaridade sosial, nee sempre feto, neebe ita espera katak tinan hirak mai oinsa mak fo espasu ba feto atu bele iha governu foti mos dezisaun iha ezekutivu nomos iha parlamentu,” katak eis Sekretariu Estadu.
Eis SEII hatete, iha parlamentu sorti iha kouta 30% nia numeru 3, 6, 9, maibe karik posiblidade bele fo mos ba iha numeru 2 ka 1.
“Ezekutivu ita hotu kestiona, laos kestiona, maibe tanba saida karik feto mak asumi kargu mak sira lakohi prefere liu mane, balun prefere ba parlamentu duke ba governu, nee iha VIII Governu akontese, ida nee mak sai hanesan bareira ida, maibe bareira nee la halo ami atu hakmatek iha fatin, maibe ho bareira neebe mak iha halo ami esforsu aan nafatin oinsa mak atu involve iha prosesu tomak,” katak nia.
(eme)