DILI, STLNEWS.co – Daudaun nee folin foos kontinua todan ba komunidade, liu-liu ba komunidade neebe menus rendimentu, tanba nee husu IX Governu atu rápida lalais intervensaun.
Preokupasaun nee hatoo husi Deputadu Bankada FRETILIN, Antoninho Sarmento katak, folin sai preokupasaun makaas ba komunidade, governu tenki halo intervensaun rápida hodi fo forsa de kompras ba komunidade.
“Folin foos iha baze todan liu ona ba povu, tanba nee ita levanta beibeik asuntu nee iha plenaria atu IX Governu normaliza rápida”, katak Deputadu Bankada FRETILIN, Antoninho Sarmento ba STL husi telefone iha Dili, Kinta (14/09/2023).
Nia dehan, haree ba folin foos, bainhira levanta kestaun nee, deputadu sira balu hatete, hein Orsamentu Retifikativu promulga no lei balu foin daudaun altera, promulga nee presu normal fali.
Maibe na realidade too ohin loron normalizasaun presu la akontese, presu iha merkadu aas ba nafatin, liu-liu iha merkadu lokal sira.
“Hau fo ezemplu hanesan iha Betanu deit foos folin US$ 20, ho saku 25 kilo, nee hatudu katak presiza governu nia intervensaun rapida, hodi fo espasu ba komunidade,” tenik nia.
Tanba dadaun nee komunidade neebe ladun iha rendimentu diak atu sustenta sira nia moris.
Reprezentante povu nee husu, governu tenki rapida normaliza folin foos iha terrenu, hodi fo konfiansa fali ba povu katak, governu iha kbiit duni atu normaliza folin fos hodi fo kbiit ba povu sira.
Nunee mos, Visi Bankada CNRT Patrocino Fernandes hatete, liga folin fos nee, husu governu para atu lalais halo intervensaun, maske governu halo mudansa ona ba taxa impostu husi 5% ba 2,5%, maibe folin fos nee seidauk tuun iha merkadu.
Nia dehan, maibe atu dehan katak, folin foos sae kedas husi nasaun orijen tanba nee hein katak IX Governu sei esforsu mos oinsa normiza folin foos.
Tuir nia, governu labele koalia katak enkontru ona buka solusaun, maibe tenke hatudu ona rezultadu intervensaun imediata no urjensia hodi fo forsa ba komunidade.
(gui)