Tempotimor (Baukau)-Governu liuhusi Sekretáriu Estadu Juventude no Desportu (SEJD) apoiu orsamentu hamutuk rihun US$7-resin ba Suku 2 iha Munisípiu Baukau, hodi konstrui, kampu futebol multi-funsaun.
Enkauntu Suku-2 iha Baukau ne’ebé hetan fundus husi SEDJ ba tinan 2022 nian, mak hanesan, Suku Kaibada, Postu Administrativu Baukau Vila no Suku Abo Postu Administrativu Kelikai.
“Gabineti SEJD apoiu kampu Kaibada Suku Baukau Vila nian, ne’e apoiu orsamentu US$4.654, iha fali Kelikai Aboliri, US$3.000-resin atu konstrui kampu multi-funsaun iha neeba”, informa Pontu Fokal SEJD Munispiu Baukau, Gabriel da Piedade Fraga, iha kna’ar fatin Vila Nova Baukau, Segunda (06/02).
Orsamentu ne’ebé Governu liuhusi gabineti SEJD apoiu ba Suku-2, tanba bazeia ba proposta tinan 2019 nian, ne’ebé jovem sira hamutuk ho autoridade Suku submete.
Nune’e, SEJD apoiu orsamentu hodi konstrui kampu futebol multi-funsaun, objetivu atu lori desportu hakbesik liu ba komunidade, alende mós prepara fini jogador iha nivel Suku no Aldeia.
“Ida ne’e mak polítika desportu hahú husi baze, halo kampu iha ne’eba anima joven sira iha Suku, husi ne’eba ita hetan fini foinsa’e sira ne’ebé iha talentu di’ak foin ita lori ba nasionál”, nia afirma
Xefe Suku Abo, Fidelio Sarmento dos Santos, afirma, orsamentu ne’ebé Governu liuhusi SEJD aloka ba konstrusaun kampu futebol komunitária iha Suku Abo, hamutuk US$3000, alende mós hetan apoiu fundu US$800 husi inan aman inklui veteranu.
“Fizikamente dadaun la’o hela atinji ona pursentu 25, konserteza sei fó benefisiu ba joven sira idade 19 ba kraik sei promove sira nia talentu liuhusi desportu, bele partisipa iha eventu nasionál no munisípiu sira”, katak nia
Enkauntu kampu futebol komunitária ne’ebé Governu apoiu fundus, Suku Abo konstrui iha nia Aldeia Kairedo. (*)