SUICA, STLNEWS.co – Prezidente Republika (PR), José Ramos Horta preokupa ho direitu fundamental husi feto no labarik, inklui saude materna iha mundu.
“Maski ohin loron atensaun ba direitus humanus aumenta, iha feto no labarik feto barak mak ninia direitu sei nega nafatin, hanesan direitu ba saude no ai haan, ba ema barak sei laiha. Direitus humanus tun tanba nasaun riku sira neebe desidi destinu husi nasaun kiak sira no laiha meius atu rezolve situasaun ida nee,” dehan Xefi Estadu iha selebrasaun loron Deklarasaun Universal Direitus Humanus ba dala 75 iha Davos, Suica, Sesta (20/01/2023).
Tuir Xefi Estadu, tenki hadia medida ekonomika hodi tulun nasaun kiak sira neebe afetadu mos husi Covid-19, hodi bele rezolve problema sub nutrisaun, saude materna no garante direitu labarik sira nian.
Iha biban nee, Xefi Estadu Ramos Horta fo ezemplu katak, nasaun kiak sira hasoru ameasa husi tusan esterna, hanesan situasaun neebe Srilanka hasoru, ho tusan boot husi Xina, nunee garantia ba direitu labarik, saude materna, nutrisaun no asesu ba alimentasaun hetan redusaun. Situasaun hanesan akontese mos iha Afganistaun no nasaun seluk tan.
Entretantu, relasiona ho situasaun iha Míanmar, Xefi Estadu hatete, kualidade demokrasia tun, tan iha sidadaun koletivu Míanmar balu deit mak luta ba direitus humanus.
Xefi Estadu mos koalia konaba servisu ONU nian, iha neebe halo aprosimasaun makaas hamutuk ho sosiedade sivil, hodi halo protesaun ba direitus povu minoritariu sira, maski esforsu iha tinan ikus nee ladun makaas.
(cri)