Hatutan.com, (25 Jullu 2024), Díli-Na’in bá empréza JM Automotif , Julio Fernandes, konsidera Eletrisidade Timor-Leste, Empréza Públika (EDTL, E.P) viola lei Rejime Jurídiku Aprovizionamentu (RJA) kona-bá konkursu públiku bá projetu manutensaun no fornesimentu Spare Part karreta iha EDTL, E.P.
Lee Mós: Deskonfia, Favoritizmu iha Projetu Manutensaun no Fornesimentu Spare Part Karreta EDTL,E.P
Haktuir iha karta komunikadu ho títulu “Respósta Bá Komisáriu Ezekutivu EDTL Iha Hatutan.com” husi na’in bá Empréza JM Automotif, Julio Fernandes katak, nia hili profisaun nu’udár Emprezáriu tinan 17 ona. Empréza ne’ebé nia hari’i uluk mak iha área Konstrusaun, General Supplyer.
Empréza Oficina no Loja Spare Part hari’i tinan 2011 ho kapitál mai hosi empréza rua seluk ho hanoin inovativu ida katak nu’udár Timoroan, presiza halo investimentu hodi fó servisu bá nia maluk Timoroan permanente.
Husi tinan bá tinan to’o ohin loron, empréza nia alvu kliente ida mak Governu, iha ne’ebé nu’udár ezekutór bá orsamentu jerál estadu nian. Normalmente empréza sempre prepara rekursu hotu hodi tuir tenderizasaun ruma iha área tolu hosi departementu ka empréza públiku Governu no parseiru sira seluk no liuhosi empréza tolu ne’e, sira iha esperiénsia tuir tenderizasaun bá projetu konstrusaun (uma, estrada, eletrisidade) supplyer (general supplyer) no manutensaun kareta bazeia bá rejíme juridiku aprovizionamentu nian.
Hatán bá komisáriu EDTL, E.P Latino Jerónimo nia fundamentasaun iha Hatutanc.om, edisaun 24 fulan-Jullu 2024 kona-ba projetu : Supply Of Vehicle Spare Part and Periodic Maintance For EDTL,EP. Operational and Heavy 2024 ho númeru projetu : OCB/0007/EDTL-E.P-2024 dehan katak uza arritmetic correction bá item hotu-hotu ne’ebé mak iha, hanesan mós karta resposta hosi EDTL mai JM Automotif iha loron 12 fulan-Jullu de 2024.
Empréza JM Automotif juridikamente la konvensidu tanba konsidera kontra lei no konsidera intrepretasaun kontráriu no hatuur bá projetu mak laloos.
Haree hosi presu la-normál (abnormal price) uza artigu 61 (RJA) bazeia bá deklarasaun Komisáriu nian, kontradis tanba la mensiona iha Biding Doument, maibé dehan de’it labele liu montante $300,000 (trezentos mil dolares) Bid Data Sheet ITB 2.1 no iha pree Bid Meeting JM Automotif husu ba oficiais aprovisionamento katak artigu refere la aplika.
Julio Fernandes hateten, artigu 61 (RJA) labele aplika bá projetu ida ne’e tanba presiza mak presu unitáriu spare part ne’ebé mak baratu liu hodi soma hamutuk ho presu manutensaun A,B ho C, tanba projetu ne’e pakote ida.
“Arritmatic correction labele aplika bá projetu ida-ne’e tanba item rua de’it mak; orsamentu spare part ho orsamentu bá servisu/ongkos kerja. Item rua ne’e uza bainhira presiza duni atu troka tanba aat no iha momentu troka mak mosu orsamentu servisu/ongkos kerja no halo manutensaun A,B ho C. Tanba ne’e maka montante orsamentu iha kontratu bazeia bá alokasaun orsamentu hosi parojetu nain durante tinan ida, i ninia ezezusaun bazeia de’it bá nesesidades to’o hotu i dala-ruma prazu kontratu seidauk hotu mós orsamentu bele hotu ona i balun mós to’o prazu kontratu hotu orsamentu la ezekuta hotu,”Julio Fernandes argumenta.
Seluk fali, nia hateten, arritmatic correction ne’e bele uza de’it bá projetu sira hanesan konstrusaun nian tanba orsamentu kada item sei uza hotu, tanba montante orsamentu mensiona iha kontratu bazeia bá kotasaun hosi empréza. Tanba ne’e maka bainhira présu orsamentu menus liuhosi pursentu 20 (20%) to’o pursentu 30 (30%), loos duni katak, sei prejudika kualidade projetu tanba ho intrepretasaun kualidade presu tenke uza formula refere.
Julio Fernandes husu prezidente EDTL,E.P haree no tetu didi’ak hodi deside bá empréza ne’ebé mak merese no direitu bazeia bá lei hodi sai parseiru atu ezekuta servisu sira bazeia bá nesesidades.
Jornalista: Rogério Pereira Cárceres