DILI, 03 jullu 2024 (TATOLI) – Governu liuhusi reuniaun Konsellu Ministru, kuarta ne’e, rona no diskute kona-ba preparativu Timor-Leste nian ne’ebé atu sai uma na’in ba jogu CPLP XII ne’ebé sei realiza iha 2025.
“Asuntu ne’e aprezenta husi Ministru Juventude, Desportu, Arte no Kultura (MJDAK), Nelyo Isaac Sarmento, kona-ba preparativu ba Jogus Desportivus CPLP XII, eventu multidesportivu ida ne’ebé halibur partisipante ho idade menus husi tinan 16 husi nasaun CPLP sia, ne’ebé sei hala’o husi loron 17-27 fulan-jullu tinan 2025,” tenik iha nota ne’ebé Agência TATOLI asesu husi media Palásiu Governu.
Notísia relevante: Governu esforsu hadi’a fasilidade desportiva antes realiza jogu CPLP
Antes ne’e prevee ona atu realiza eventu ne’e iha tinan 2020, maibé tenke adia fali tanba pandemia COVID-19.
Durante aprezentasaun ne’e, sira diskute kona-ba infraestrutura ne’ebé iha hela preparasaun, inklui resintu (fatin) oin-oin ba modalidade desportiva ne’ebé diferente, alojamentu, transporte, servisus médiku, seguransa no seluk tan.
Alende ne’e, aprezenta mós ba membru Konsellu Ministru logótipu no múzika ne’ebé kria liuliu ba eventu internasionál ida-ne’e.
Notísia relevante: 16 abríl, komisaun mai avalia preparasaun TL hodi sai uma-nain ba jogu CPLP 2025
Jornalista: Hortencio Sanchez
Editór: Florencio Miranda Ximenes