DILI, STLNEWS.co – Komunidade Suku Villa Verde, Postu Administrativu Vera Cruz, Munisipiu Dili, kontinua soe lixu arbiru iha bairu laran, tanba fatin lixu laiha.
“Ita hotu haree foer sira neebe namkari iha ita nia bairu laran, dalan ninin, baleta kuak, tanba ita nia autoridade lokal no ita nia governu ladun servisu hamutuk. Nee mak komunidade sira soe foer arbiru,” hatete Komunidade Villa Verde, Adolfu Januari da Costa ba STL iha Sede Suku Villa Verdi, Dili, Tersa (12/09/2023).
Nia tenik, soe foer arbiru mos bele fo impaktu ba komunidade sira nia saude, tanba bele lori moras sira hanesan mear, malaria no seluk tan.
Iha fatin hanesan, Xefi Suku Villa Verde, Abdul Mancoli Arranhado rekonhese populasaun sira la kumpri orariu soe foer neebe fo sai ona husi saneamentu Munisipiu Dili, bazeia ba dekretu lei numeru 33/2008 konaba ijiene no orden publika, katak orariu soe foer nian mak hahu tuku 4:00 madrugada too tuku 7:00 dadersan.
“Hau husu tenki aplika dekretu lei numeru 33/2008, atu ema neebe soe foer arbiru tenki hetan sansaun, se lae ita Timor nee labele. Foer nee ema mai raut tiha fila kotuk nakonu fali ona, uluk dehan tuku 7:00 dader ba leten labele soe foer ona, maibe ema nafatin soe foer,” nia informa.
Nunee mos Xefi Departementu Saneamentu Munisipiu Dili, Domingos dos Santos Suriano katak, komunidade sira laiha konsiensia hodi tau foer iha lixu fatin neebe governu prepara ona.
“Fatin lixu ami prepara tiha ona iha suku laran, maibe komunidade laiha konsiensia tau foer iha fatin ne’ebe ami prepara,” nia esplika.
Tuir nia, problema soe lixu arbiru laos deit iha Villa Verde, maibe kuaze iha Dili laran tomak, iha bairu-bairu sira foer sei nakonu iha fatin-fatin. Hanesan iha dalan boot Mascarenhas, Kaikoli, Balide nian.
(jen)