BOBONARO, 29 jullu 2024 (TATOLI)-Hafoin akontese udan iha loron-sesta, 26 jullu to’o loron-domingu, 28 fulan-jullu ne’e rezulta estrada iha área Hol-lak, Ilibole, suku Oe-leu, postu administrativu Bobonaro, munisípiu Bobonaro nakonu ho tahu-dodok hodi difikulta movimentasaun transporte públiku no privada husi diresaun Maliana ba Bobonaro no postu administrativu Lolotoe.
Komunidade Fátima Mendonça, sente triste tanba estrada ne’e aat kuaze tinan 20-resin ona governu la tau prioridade atu hadi’ak.
Nia reforsa, bainhira tempu udan estrada referida sempre sai preokupasaun públiku tanba impede komunidade atu halo viajen ba mai ho seguru.
Notísia relevante: Estrada iha Oe-leu difikulta movimentu transporte Maliana-Bobonaro
“Ami senti terus liu ona, nai-ulun sira favór loke-matan mai haree ami-nia estrada ida-ne’e, tanba tinan-tinan udan ona ami liu ladi’ak, tahu nakonu, kois loos. Sé ami liu hodi bi’it ami tenke ajuda malu, karreta sira-ne’e sa’e labele dada malu balu to’o atu baku-fila, kuandu udan boot, karreta sira labele liu, entaun sira tenke toba iha ne’e to’o kalan boot, dalaruma dadeer rai maran mak foin bele liu,” nia informa ba Tatoli, iha Ilibole, segunda ne’e.
Komunidade postu Bobonaro, Moisés de Jesus Lopes, husu ba Ministériu Obra Públika atu orienta empreza Viera Amor atu responde urjénsia hodi fasilita movimentasaun públiku.
“Estrada sa’e mai ne’e kompañia Vieramor mak halo dezde 2017 to’o agora seidauk hotu, ne’ebé sé bele governu tenke haruka sae mai hadi’ak nune’e ami bele liu,” nia fó hanoin.
Nia hatutan, governu mós presiza tau ona iha planu orsamentu atubele halo reabilitasaun iha tinan 2025,ntanba estrada ne’e alternativu ne’ebé ligasaun husi munisípiu Bobonaro ba Covalima inklui postu administrativu Atsabe, nunisípiu Ermera.
“Ami Bobonaro mak tinan-tinan, kuandu udan problema ne’e laiha seluk, iha fatin oan ida-ne’e de’it, dalaruma karreta ida patina ona entaun restu ne’e paradu hotu, husi ne’e ba to’o Ilibole, depois husi leten ne’e bele ba to’o Oe-leu vila,” nia katak.
Enkuantu estrada hahú husi Lahomea ba to’o Bobonaro, Kompañia Vieramor mak halo manutensaun emerjénsia hahú iha tinan 2017 to’o agora seidauk finaliza no kustu ba obra ne’e totál millaun rua-resin ($2,060.737,42).
Notísia relevante: Estrada iha Oe-leu haterus komunidade viajen Maliana-Bobonaro
Jornalista: Sérgio da Cruz
Editór: Evaristo Soares Martins