DILI, 07 jullu 2024 (TATOLI) – Ekipa Futsal mane hosi Ministériu Finansa sai kampiaun ba tasa Futsal Banku Nasionál Komérsiu Timor-Leste (BNCTL, sigla portugés) Cup tinan ne’e, hafoin halakon tiha ekipa Futsal mane hosi Ministériu Agrikultura, Peska, Pekuária no Floresta ho ho eskore 6-3.
Iha kategoria feto ekipa Futsal hosi Bee Timor-Leste, Empreza Públika (BTL, EP) mak sai manán-na’in iha tasa Futsal BNCTL Cup2024 hafoin halakon ekipa feto hosi Sekretaria Estadu Formasaun Profisionál no Empregu liuhosi suta penalidade ho eskore 4-3.
Enkuantu ekipa Futsal mane hosi Sekretaria Estadu Kooperativa (SeKoop) mak sai manán-na’in ba terseiru lugár no ekipa Futsal feto husi UN Agency mak sai manán-na’in ba terseiru lugár iha tasa Futsal BNCTL Cup tinan ne’e.
Vise-Primeiru Ministru no Ministru Kordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, apresia ba BNCTL tanba bele realiza eventu jogu futsal BNCTL Cup tinan ne’e hodi halibur no diverte ema liuhosi futeból Salaun durante fulan ida-resin.
“Ohin ita fila-fali mai atu ensera atividade ne’e no iha jogu enseramentu ne’e sei iha manán no ida-ne’e la’ós importante, importante mak liuhusi jogu ida imi kontinua hatudu espíritu unidade, ida-ne’ebé mak lakon ita apresia no ida-ne’ebé ita nafatin basa liman no apresia,” Mariano Assanami, hato’o apresiasaun ne’e iha serimónia enseramentu jogu tasa futsal BNCTL Cup tinan ne’e, iha kampu Futsal Bebora, domingu ne’e.
Prezidente Konsellu Administrasaun BNCTL, Lúcia da Cruz, apresia ekipa sira-ne’ebé partisipa iha tasa Futsal BNCTL Cup tinan ne’e, tanba durante eventu ne’e la’o ekipa hotu hotu hatudu duni espiritu fair play.
“Jogu manán ka lakon ne’e normál, maibé oinsá mak iha jogu ida ita hatudu espirtu ida fair play ne’e mak importante, oinsá hatudu respeitu malu lihusi jogu ne’e, oinsá hatudu unidade iha jogu ida atu nune’e ita hotu iha ambiente amizade no unidade nia laran no durante ne’e ida-ne’e mak ita-boot sira hatudu,” nia apresia.
Lúcia mós gradese ba ema hotu nia apoia liuliu komunidade Bebora ba BNCTL hodi fó susesu ba realizasaun tasa futsal BNCTL cup bele la’o iha ambiente ne’ebé di’ak.
“Ami iha-ne’e hakarak agradese ba ema hotu nia kontribuisaun ba ekipa sira-ne’ebé partisipa iha jogu ida-ne’e no ba komunidade Bebora ne’ebé koopera tebes tebes ho ami hodi fó seguransa ba eventu tasa futsal BNCTL cup bele la’o iha ambiente hakmatek, ami-nia apresiasaun boot ba imi hotu,” nia kongratula.
Entretantu komisaun organizadora atribui mós prémiu ba ekipa mane hosi Ministériu Finansa ne’ebé sai hanesan kampiaun tasa futsal BNCTL cup 2024 ho montante rihun $5, Ministériu Agrikultura, Peska, Pekuaria no Floresta (MAPPF) sai hanesan segundu lugár ho orsamentu rihun $3 no terseiru lugár Sekretaria Estadu Kooperativa (SeKoop) hetan osan rihun $2.
Enkuantu iha kategoria feto ekipa Futsal hosi Bee Timor-Leste, Empreza Públika (BTL, EP) mak sai manán-na’in iha tasa futsal BNCTL cup 2024 hetan premiu ho osan montante rihun $5 no ekipa Futsal feto hosi Sekretaria Estadu Formasaun Profisionál Empregu hetan osan rihun $3.
Enkuantu ekipa Futsal feto husi UN Agency ne’ebé mak sai terseiru lugár iha tasa futsal BNCTL cup tinan ne’e hetan osan rihun $2.
Komisaun organizadora mós atribui prémiu osan hamutuk $250 ba mellór guardarede no mellór markadór. Ba mellór gruadarede manán hosi ekipa futsal mane husi Ministériu Agrikultura, Peska, Pekuária no Floresta (MAPPF) ho naran Mário do Santos tanba durante eventu ema hatama golu 18.
Hosi parte ekipa feto mellór guardarede manán hosi UN Agency, Silvia. No mellór markadór hosi ekipa futsal mane manán husi Ministeriu Finansa Ángelo Ivo Fernandes ho golu 30. Enkuantu mellor markadór ekipa Futsal feto tasa BNCTL cup 2024 mak Lou Dicky hosi BTL, Ep hatama golu 20.
Jornalista: Natalino Costa
Editór: Evaristo Soares Martins