Hatutan.com, (02 Agostu 2024), Díli- Timor-Leste no Repúblika Sosialista Vietname asina tan akordu izensaun vistu ba pasaporte servisu no diplomátiku nudár prinsípiu adezaun Timor-Leste nian ba organizasaun rejionál Association of Southeast Asian Nation (ASEAN).
Lee Mós: KM Aprova Akordu Izensaun Vistu Entre TL ho Singapura, Tailándia no Brunei Darussalam
Akordu ba izensaun vistu ba pasaporte servisu no diplomátiku ne’e, Ministru Negósiu Estranjeiru no Kooperasaun, Bendito dos Santos Freitas ho Vise Ministru Negósiu Estranjeiru Vietname, Do Hung Viet, ne’ebé hala’o iha Palásiu Prezidensiál Hanoi-Vietname, Kinta (01/08/2024).
Prezidente Repúblika, José Ramos-Horta ho nia omólogu Prezidente Repúblika Sosialista Vietnam, To Lam, sai hanesan testemuña bá akordu kooperasaun ida-ne’e.
Ministru Negósiu Estranjeiru no Kooperasaun, Bendito Freitas hateten, Timor-Leste ho Vietnam selebra ona akordu kona-ba izensaun vistu ba pasaporte servisu no diplomátiku, tanba ne’e nudár prinsípiu adezaun Timor-Leste nian ba ASEAN.
“Iha prosesu enkontru ne’e mós termina ho asinatura akordu ida kona-ba izensaun vitu ba pasaporte servisu no pasaporte diplomatku. Ida-ne’e hanesan prinsípiu ida-ne’ebé Timor-Leste nia adezaun ba ASEAN, hanesan parte integrante katak, país ASEAN sira ita iha konkordánsia ba akordu izensaun vistu ba pasaportes servisu no diplomátiku, au-mezmu tempu sei trata ba izensaun ba pasaporte ordináriu, ita espera katak, kooperasaun bilateral entre Timor-Leste ho Vietnam, bele forte liután,” Bendito dos Santos Freitas, iha komunikadu ba imprensa ne’ebé Hatutan.com asesu husi Gabinete Média MNEK, Sesta (02/08/2024).
MNEK Bendito Freitas hatutan, enkontru ne’e, destaka mós kona-bá mekanizmu valores no prinsípiu kooperasaun ida-ne’ebé mak Vietnam bele tulun Timor-Leste nia adezaun ba ASEAN, no apresia mós Timor-Leste nia susesu lubuk ida-ne’ebé alkansa hodi bele sai membru plenu ba ASEAN inklui Organizasaun Mundiál Komérsiu.
“Importante liu mós ohin ita-nia Prezidente Repúblika mós husu atu Vietnam estabelese ona embaixada iha Timor-Leste, tanba ita tau ona ita-nia embaixada iha paízes ASEAN hotu, agora Vietnam mós tau nia embaixada iha Timor-Leste di’ak teb-tebes, nestemomentu Embaixadór Vietnam ne’ebé kobre ba Timor-Leste ne’e nia rezidente iha Jakarta,” Bendito dos Santos Freitas hateten.
Jornalista: Vito Salvadór